Chikankata Mission chuan a vawikhatna atan Zambia sorkar hnen atangin lirthei, Landcruiser pahnih a dawng ve ta. A 'vawikhatna' tih awmzia tak hi sawifiah deuh ila. A hmain motor nei loin kan awm thin tihna ni loin, he lirthei pahnih kan neih tharte hi sorkar atanga kan dawn hmasak ber te an ni tihna a ni. Salvation Army World Services Office (SAWSO), IHQ leh ram pawn atanga tanpuina dang lo lut azarah lirthei lamah chuan kan hnianghnar viau zawk a. Tunah hian truck 1, tracktor 1, minibus 2, light medium vehicle 9, motor cycle 12 leh bicycle engemawzat kan nei mek a ni. Heng kan lirthei neih te enkawl hna thawk tur hian school leh hospital-ah workshop pakhat ve ve kan nei a. Mechanic thiam tak tak ten an thutchilh reng avangin hmun dang pan buai a ngai lo. Heng kan lirthei neih te hi kan chhawr tangkai em em. Mission hnuaia hnathawk tupawh maiin official duty a nih phawt chuan an hmang thei a. Tin, thlatin vawikhat theuh mahni hna tul - shopping trip leh tul dangte tih nan a huhoin emaw hman theiha ruahmnan a ni.
Ambulance service hi a tha thlawt. Pahnih kan nei a, a chhungah hian Oxygen leh life saving equipment dangte dah vek a ni. Nikhata darkar 24, kar khata ni sarih service an ni a, khawi hmun atang pawhin koh theih a ni. Damlote an inah an va lam mai thin. A hman man hi a nei lo chu ngaihhnathiam mai an ni a, a pe theite pawh a tui man bak laksak an ni ngai lo. Thil mak leh ropui deuh mai chu heng avangte hian hospital hi insengso viau mahse, kan senso hnawhkhahna tur hi khawi maw atangin a lo lut leh mai thin a. Kan Hospital Manager (Administration) Richard Bradbury chuan 'Pathianin min rawn pe leh mai thin' a ti! 
Ni 11 July 2008 khan heng lirthei kan neih thar pahnihte hi Pathian hnenah hlan a ni a. Hlanna hun hmangtu Major Mabuto, kan Mission Director chuan "GRZ (an sorkar motor number, Mizoram ZRG ang hi) tih chuanna motor kan neih vawikhatna a ni a, hun kha leh chen sorkar zem zen buai lova kan mission a kal thei hi a lawmawm tak meuh a, tunah chuan mission hnathawktute kan lo pungin mamawhna a lo sang ta a, sorkar pawhin thil min tihsak a duhna hi a rei ta a, lawm takin kan pawm ta a ni e", a ti a ni. 
8 comments:
E.. Dr. Zaia chu, i dam em? min hre tawh lo maithei a, ka pa kha chu i hria ang! I va awm hla ta veng veng ve....
Pathian rawngbawlin Mizote kanin zar pharh ve ta hle mai tih nangni chhungkua atang hian a hriat hle mai.Africa ram daih ah te rawngbawltu pawimawh tak kan lo nei ve reng che u.Inrawngbawlnate Lalpan malsawm zel rawh se.
congrats to you Thiama. Keini pawh helaiah hian hma kan sawn ve zel e
@joseph:Ka hria che lawm. I pa kal tak thu ka lo hria a, ka ui hle mai. I pa nen khan kan innel hman viau asin, 'Pa Awma' kan ti reng mai kha nia. A that vak loh hnu phei kha chuan telephone hian min rawn rawn fo thin a, ralkhat atanga medical advice ka lo pek ve thin kha a hlut viau niin ka hria, min tilawm thin. I zirnaah theihtawp chhuah la, kan lo tawngtaipui dawn che nia. Pathianin awmpui che rawh se.
@sekibuhchhuak:I mi duhsakna tawngkam hi kan hlut hle mai, kan lawm e. Nia i sawi ang hian Mizoram/Mizoten kan 'export' neih hlut ber chu missionary-te hi an ni. Tunah hian keimahni Salvation Army hnuaia thawk Kenya-ah Mizo Officer nupa tuak 1, Mozambique-ah single Officer(hmeichhia) 1, an awm bawk e. Nangmah tiamin Pathian hian rawngbawl turin min ko vek a ni!!
@riangtlei=Khawngaihin 'helaiah' hi khawilai nge tih ka hre chak hle mai. Ka hming min kohna lah hi chhungkhat hnaivai leh Jampui lama mite min kohna a ni a, i blog hi ka tlawh hlawhchham tlat bawk si. Hma lo sawn zel teh u.
hmanni deuh khan i blog hi ka chhiar thuak thuak ringawt a, hei eng in nge mawni mi a mawlh tlat a ka rawn lut leh e..in nupa rawngbawlna a ropui hle mai..Pathian in awmpui zel che u rawh se..
@luliana: Thanks for the kind words.It's really encouraging to hear from you. We love your blog too!
Zaia ka hriat kha i ni em aw ka tia! Behliangchhip i han sawi lan hian ka hriat Zaia ngei kha i ni tih ka hria. Africa ram lam ah te Missionary in i kal ang tih ka lo ngaihtuah ngai lo, in chanchin hriat anuam hle mai. Pathian in in rawngbawlna malsawm zel ang che u tih ka ring. Heng mite ber chunga in tih hi ka chunga ti in ni ati sia. Patna a Doctor in zirlaia U Mahruaii kha ka ni e. Tun ah Chiang Mai, Thailand ah awm.
@rcmahruaii: U Mahruai i ngaihawm hle mai. I va thleng chhak ta ve le, Pathian rawngbawltua inpek tawh hi chuan kal tura min tihna lam lamah kan kal zel chu a nih hlawm hi maw! Keini tak ngial pawh Africa ram pik-ah AIDS veite zinga rawngbawl turin min koh tak hi. Mamawhna a nasa ta a ni ang e. Ka nupui Mapuii (Laltlankimi) hi Higher Sec. School-ah a thawk mek bawk. I hniakhnung kan rawn zui ve a ni e. I rawngbawlnaah duhsakna zawng zawng kan hlan a che. Email zairemthiama@yahoo.co.in ah hian min rawn mai ta che. Chanchin inhriatsak tawn a chakawm alawm.
Post a Comment