Ward - OPD – PTA - Mortality Meeting – Nauawm

Vawin hun chu indaih loh a na khawp mai. Thupui atana ka hman indawt dan ang deuh khian hun kan hmang a, nikhatah hian darkar 24 ni lovin darkar 48 tal awm zawk se tih te pawh a awl rum rum mai.

Zing dar 7:30 AM-ah handover meeting neiin Pathian hnena inhlanna nen bul kan tan a, ka ward chan Male Medical leh Bethany (TB ward)-a damlote ka en zawhah OPD-a damlo enin ka chhunzawm leh a. Damlo engemawzat ka en hnuin kan fanu Melissa-i te school Baama Academy-ah Parent Teacher Association (PTA) meeting attend turin ka tlan phei leh. Hun tha tak kan nei a. An school board member-te leh teacher-te hnenah lawmthu sawiin, fuihna thu tlem ka sawi ve, an dawngsawng tha hlein ka hre ve. Melissa-i hian kumin kumtir atang khan nursery a tan ve a, English leh Tonga zir chawp anih bakah, thil dangte pawh a tan chuan thil thar hlir a ni chungin an term examah 5-na a ni ve ran a, distinctionah pass-in kum 1 chuang lo kal tawhte pawh a va khum ve zak a ni. School a kal tan atangin hmasawnna tam tak a nei a, a nau Marcus-an a hnen atangin thil tam tak a lo zirthiam zui bawk a. Chuvangin, vawina an school-a lawmthu ka sawi pawh hi thinlunga lawma khat liam chunga sawi ka ni.

Chawhnuah OPD-a damlo ka en leh hnuin Mortality Meeting-in a chhunzawm a. He hun hi thlatin Nilaini vawi hnihnaah kan hmang thin. Doctor, Clinical Officer leh nurse te kalkhawmin, thla kalta chhunga kan damlo thi tate chanchin (case history) thlir letna hun kan nei a ni ber a. Thita chungah khan kan tih tur kan ti em? Kan tih loh tur kan ti em? Khawi laiah khan nge tihsual kan neih? Engtin nge thil tha zawkin kan tih theih ang? ti tea inzirna hun a ni ber. Tangkai tak a ni. Tin, vawin kan meeting-ah hian Chikankata Hospital bik hman tur ‘Suggested Protocol for the Treatment of Cryptococcal Meningitis’ tih paper ka siam chu kan zirho a, suggestion ka siamte tha kan ti tlang viau niin a lang. Dr. Gretchen Birbeck, Michigan State University-a Neurology Professor a rawn tel bakah, UK atangin medical student 2 leh Sweden atangin 1 a rawn tel bawk a, an thawhhlawk ve khawp mai. Chikankata kan vanneihna chu researcher te leh mithiam tak takte hmun dang atanga kan nei reng hi a ni.

Hah hnepa ina ka haw hnuin Mapuii’n nau awm turin min lo ti a, a chhan chu an school-ah tlai dar 6 PM a tan tur Welcome & Farewell Meeting pawimawh tak a attend a ngaih vang a ni. Chikankata-ah hian thil kan tih tak tak avangin inthlah leh inlawm hi a awm chamchi reng a, kan che a, kan lut a, kan chhuak thin bawk a ni e.