Tuna Chikankata Salvation Army Mission-a thawktu tam tak zingah hian ram pawn lam mi (expatriate personnel) chhungkaw pasarih kan awm ve a. American, Australian, British, Danish, Swedish leh keini Indian zinga kan British nula pakhat (Asst. Nursing Officer) tih loh hi chu chhangchhe chhungkua vek kan ni. Kan zingah hian kan fa naupang zawk Marcus-a (kum 2) aia nau naupang/nausen panga lai zuk awm a! Mingo ho pawh hian chhangchhiat hi an lo pawiti vak lo a ni awm e. Anni lahin doctor ho pawh hi min ti ve bawk a.Vawin hian kan rawngbawlpui leh thiante British mi leh Zambian nupate chuan an fa pahnihna atan fanu duhawm tak an nei thar a. A hmeichhiate khaw lam London-a chawlh an hmanna hmunah naute hi zai chhuah a ni. An fa hmasa hi mipa a ni a, fanu thar an nei hi an lawmpuiawm ngawt mai. Tin, Melissa-in thiannu thar a neih tak avang pawhin kan lawm. A hma zawng khan an zingah amah chiah hi hmeichhia a ni reng thin a.
Chikankata leh a chhehvel hmunah hian kan vah velnaa hmeichhe puitling kan tawh reng reng hi chu raipuar an nih loh chuan fasen pawm an ni deuh zel a. Chawhrualin fa 7 – 8 ang vel zel nei an ni. An chhang a zing bawk. Nupui pakhat aia tam nei an awm fur a, nupui pahnih pathum neite zingah phei chuan fa 20 chuang neite an awm nawk. Pasal intawm hmeichhiate inelna leh inropuisiakna chu fa neih tam hi a ni!
Heti hi ni mah se, mihring an pung chak lo. AIDS leh natna dangte avangin an thi hma/rang ve thung a, a bik takin thalai ramtang rual, an ram hnukpuite hian an peih loh san hma thin. A bul lamah arh hluai thin mah se an zuih ral hma thung. Europe lama mihring pun dan hmang (population growth pattern) nen a inpersan chiah a ni. Anni ramah hian naupang leh thalai an tlakchham laiin tar chak tawh lo an ngah lutuk thung a. Hei pawh hi a tha chuang lo. Tuna India ram kan dinhmun ang hi a tha tawk viau awm e.
Hmanni chu ka chesual pek a. Kan hospital-a thawk ve mi pawimawh tak mai hi thingtlang lam atangin a pain a rawn tlawh a. Kan inhmelhriattir vel laiin a pa hnenah chuan, a naupang rawn hruai chu ‘ka pu, i tupa chu a fel hle mai’ ka ti rawk a. Ani lah chuan a fapa naupang ber anih thu min hrilh zui. Naupang kum 4 mi vel a ni, a fa 15 zinga a te ber hi.
4 comments:
in thohna chu anom hmel khop mai, changkang deuh ai chuan tanpui ngai ngoih ngoihte bula om hi anuamin rilru hi ahlim zok zel ania, all the best. ka lo tt pui thin dawn che u nia.
in reh vang2 ka tia..nimin CHAN ka len laiin i blog hi anlo nei hlauha..in email leh tawh ila mawle?
chhangchhiat hi a nuam phian zel mai
kei pawh fa 2 ka nei ve a, chhangchhia chu kan inti ve viau mai. tuk pum, emaw, zan lam mut hma emaw, holiday leh saturday nileng emaw te hi tih ber sawi tur awm si lo hian kan buai em em thin a ni e. Eng pawh ni se, chhangchhiat lai hi VANGLAI te pawh an lo ti ve tho a nia. In hnaah tluang taka inthawh theih nan duhsakna ka hlan a che u.
@faerie=Nia, min mamawhtute rawngbawlsak hi kan duhthusam ber a ni. Kan hlimpui bawk. Thanks for the promised prayer support.
@kodaiboy=Chhante,ka rawn mail thin alawm, i hnen atangin reply ka dawng lo mai zawk a ni. Zau zawka rawngbawl tura Pathian kohna che kha i la vawn reng kan rin.
@ngcha=Khawvelah chhangchhiatpui tam tak an awm a ni tih hriat hi a nuam. Heta kan Australian thianpa pawh hi kum zawnin fa an nei ngawt a, nau a awmna lamah ni khat chhung hian Chikankata khawchhung vawi 2 te a helchhuak hman!! Chhangchhiatah pawh chhangzingchhiat ngat hi chu buaithlak tak a ni.
Post a Comment