Salvation Radio - Made in Chikankata

Chikankata SA hi kan intodelh ve riau a nia. Hospital, Primary & Higher Secondary School, Nursing College, Biomedical College-te kan neih bakah, Research activities tam tak kan kalpui mek bawk a. Chutih laiin kan Salvation Radio hi kan sawi hmaih thei hauh lo ang. He project hi USA territory palite tangkawp bul tum a ni a. Kan khaipa ber chu Colonel Damon Rader a ni. Ani hi General Paul A. Rader (R) unaupa a ni a. Kum upa lam ni tawh mahse, la viak tha tak a ni. Tun kar 4 kalta chhung khan, kan broadcast coverage a zauh zawk theih nana hna pawimawh tak thawkin a rawn buai char char a, naktuk hian America lamah a haw leh ang.

He radio station (studio) hi SA ta liau liau a ni a. Nitin hian programme khat takin hman a ni ve thin. Pathian thusawi te, Bible study te, Gospel song & music te bakah Health Education Programme te hman a ni thin a, Tonga leh English tawngtein programme buatsaih a ni thin. Chanchintha thehdarh nan leh hriselna kawnga hmalak nan a tangkai em em a ni.

Kan hospital ward zawng zawng hian Radio system a nei vek a. Hospital news zantin puan a ni a, Mihang nula leh tlangvalin zei taka English pai deuh hleka 'This evening you are listening to Salvation Radio, Chikankata. Tonight in the hospito, the doc-on-call is Dr. Zairemthiama' tia an han puang talh talh mai hi zawng a nawm dan a dangin a ropui ve hranpa thin ngawt mai. Kan ward round te hi kan han su ve lawp lawp pah bawk thin lo thei lo a ni!!

Kan hotute rilrua hmachhawp lian tak awm chu Salvation University din hi a ni. Pathianin rem a tih chuang engtikah emaw a hlawhtling leh mai ang, Chikankata-ah hi chuan!