We Stay Blessed Against All Odds

Mizoin thluaka khawsik lut kan tih mai, natna hlauhawm tak ‘Meningitis’ hi khawvel pum huap statistics atanga a lan dan chuan a thlentu bulpui ber Bacteria a ni a, Virus leh TB-in a dawt leh a, Cryptococcus neoformans (Fungus) vanga thleng hi chu a dangte nena khaikhin chuan sawi tham pawh a tling lo. Kan hospital-ah ve thung hi chuan he statistics letling thawk hi kan dinhmun a ni. Cryptococcal meningitis a hluar ber a, TB meningitis leh Viral meningitis ten an dawt leh a, Bacterial meningitis a tlem ber thung.

A chhan chu, Cryptococcal meningitis leh TB meningitis te hi ‘opportunistic infections’ (O.Is.) kan tihte zinga mi an ni a. HIV/AIDS hrileng (epidemic) avang hian heng meningitis chi hnihte hi a pung hluai a ni ber mai. AIDS veite zinga natna leh thihna tam tak thlentu a ni mek a, Africa ram tam takin an manganpui mek a ni.

Pu Costern Hachintu, 42 (amah leh a chhungte phalna laa a hming leh thlalakte hi tarlan a ni) hi Cryptococcal meningitis vangin thla 4 chhung tehmeuh nikhawhrelo (unconscious)-in a awm hnuah tunah chuan a lo dam leh tan ta a. Kan nurse te, ama chhungte leh kan physiotherapist-te thawhrimna zarah hma a sawn chak hle a ni. A damdawi mamawh tak hmanga hun rei tak enkawl anih hnuah a thluak tui (CSF) hi, natna hrik (Cryptococcus neoformans) a la awm leh awm loh hriat nan vawi 3 exam nawn a ni tawh a, tunah chuan a fim (sterile) ta vek e. Kan medical team te thawhrimna leh a chhungte inpekna zarah a thil theihnghilh tawh tam takte pawh a thiam chak leh sawt hle a ni.

Male Medical Ward khum hmasa ber changtu

anih vang pawh a ni ang e, ward ka round apianga min lo dawngsawng hmasa bertu chu amah hi a ni. A chhelna te hian min fuih thin a. Pathian ring chunga, inpekna thuk tak nena kan thawh phawt chuan, kan thiamna beitham tak pawh hi malsawmin a awm fo thin a ni tih min hriat nawn tirtu chu, Pathian thiltih mak changtu tam tak zinga pakhat Pu Costern Hachintu hi a ni.

Pathian thiltihmak (miracle) ringhleltu i lo ni palh anih chuan Zambia thingtlanga Salvation Army Chikankata Mission hmun hi rawn pan la, i rinhlelhna a bo ang a, i rinna tihpun a ni ang.