(This post contains significant number of photos and may take it longer to appear on the screen, please be patient!!)
A chunga billboard tarlan ang hian Territorial Congress kan neihna hmun hi Zambia leh Zimbabwe ten Kumpinu awpna laka zalenna an sual hun laia thlawhna tum hmun ni thin a ni a. Hmun rai leh thengthaw nuam tak a ni.
Kan General-te nupa Chikankata hmuna kan hmuah thlen ni (19 September 2009) hian Chikankata hmunah mipui kan tam khawp mai. Chikankata main gate pawh Generalte nupa lawm lut turin hawn mai theihin a inkau mek a ni.
Zambia ramah hian Army flag hian zah leh ngaihsan a hlawh khawp mai. Flag mai ni lo, kan chhinchhiahna dang crest leh red shield te hian mite thinlungah thu a sawi thin. Anmahni ngau ngauin awmzia a nei e tihna ni loin, heng kan chhinchhiahna phena kan thil tihte hian mite rilru a hneh zawk a ni e. General hmuah ni pawh hian flag te hi chhuang takin kan pho chhuak leh a ni.
Kan General-te nupa chu Congress-na hmunah hruai thlen an ni a. March kan neih nia mipuite salute an chhang zo, an thla ka laksak lai hian an in pose fuh khawp mai. An bula mite hi kan Territorial Commander Col. John Wainwright te nupa leh Major Richard Gaudion, Private Secretary to the General te an ni.Nepal Missing: Kan General hian Inrinni zana a thusawinaah tunhnai maia S.A. in rawngbawlna a hawn tharna ram hrang hrang sawiin mipuite min fuih a. Africa khawmualpui atanga tanin-Namibia, Mali, chuatah Middle East - Kuwait-ah, Europe khawmualpui Greece-ah, Asia-ah chuan Mongolia-ah. India Eastern Territory (IET - Mizoram)-in nasa taka kan beihna ram Nepal-a S.A. rawngbawlna hawn thar anih erawh a sawi hmaih tlat mai. Mongolia ram a sawi zawh hian Nepal chungchang hi a sawi turah ka lo ngai a, chuti anih chuan IET chanchin pawh sawi tel ngei turah ka ngai a, nuam ka lo ti lawk! Mongolia ram chinah hian a tawp ta daih mai a, ka hawihil der mai.
A tuk Pathiannia kan hospital an fan laiin a Private Secretary Major Richard Gaudion-a hnenah hemi chungchang hi ka hrilh a. "I lo notice ve a ni maw, General kha han hrilhhriat ka tum laiin a thusawi kha a titawp ta hlauh si a. A Bible hman thin note a ziahna lo zawk a hmang palh a, a hmaih a nih kha, a pawi ka ti khawp mai", tiin thupha chawi titihin min hrilh.
General-te hian march an inspect zo chiah a, Congress Hall lam pan turin an pen chhuak mek a ni. 
General hmuak sipaite hian Chikankata khawchhung luhna kawngpui kan luah khat hneh khawp mai. 
Chikankata High School naupangte pawhin an theih tawka nalh banner siamin an rawn thawhchhuahpui ve a. Zirlai sangkhat chuang hi an Headmaster Oliver Mwanza hoa an rawn tleh chho mai chu, a thim hian an rawn thim chho mup mup mai a ni! 
General hmuah ni hian Officer-te hlei hleiin nuam an ti. Uniform famkim nen, mipate pawh outdoor fatigue, lukhum nen ngat an rawn thawk chhuak a ni. 
General a rawn thleng tep a,nghakhlel takin kan thlir mek.
General a rawn thleng ta e. Chikankata Scouts-in hma an rawn hruai a, an tiang nen an ther far mai. 
General hi Zambia rama an cham chhung zawngin President's Office-in Diplomatic Security Police (DSP) te a escort-tir a. A kalna apiangah DSP motor-te hian a hma hruaiin a hnung a dawl zel a ni. 
Naupangten salute an pe a, Generalte nupa hian naupangte hi hmuh nuam an ti hle niin ka hria.
A Remchang: Congress Hall leh buk (tent) tam tak hi Elephant grass hmanga sak a ni a, a chungte hi ruahpui vanawn dawng atan chuan duhthu sam lo mahse, nisa vawl vawl lak atang chuan min chhan ve khawp mai. A remchanna dang pakhat leh chu inkhawm zat chhiar a awlsam. Usher-te kha inkhawm ban apiangin kawngkaah an lo ding a, a chhuak apiangin kan hall bang hi kan thliak hmawk mai a, usher-te kutah kan hlan a. Usher-te hian mihring chhiar loin hun thawl tha an neihah kan bang/di thliah kha an lo chhiar tawh mai thin a ni. 
Territorial Band-te hian mawi takin Congress hun chhung zawng hla min rem sak a, uniform pawh an nei nalhin an smart khawp mai. 
Zambian culture-ah hian lam hi an uar hle a, a mawng hem zawnga lam chi an ni lehnghal. Hei hi Congress Hall lamtual zau tak chu a ni a. A zau hle nain songster-te hla rem tura an rawn chhuak tak tak hi chu an leng ngai mang lo. Songster member hi an tam sa thin bakah a phur phur hian an rawn zawm ta thin a! 
Junior soldier songters pawh mawi taka zaiin an rawn lam a. Zambia Territory hian Junior soldier an ngahin an nei tha takmeuh a ni. Heti hi anih avang hian S.A. hmathlir a eng hleah ka ngai a. Pathianni Thianghlima Inkhawmah General hian mi 50 chuang Sipai puitlingah a lawmlut nghe nghe. Chikankata Corps pawhin tum khat chu a rualin nausen 75 hlanna a nei tawh bawk.
Territorial Youth songster zai turin an rawn zai/lam chhuak mek. Zaipawl hi an thuthmun atanga rawn kalin an rawn zai ringawt lo a, hla puitling pakhat sain an rawn zai-lam chhuak ngei ngei tur a ni. Chumi hnuah zai tak takin a zui a. An haw lam pawh an zai-lam haw ngei ngei bawk. Chuti anih chuan hla pathum hu zel an sa tihna a ni a, inkhawm hi a rei lo thei thin lo. Mahse a ninawm ngai lo. 
Congress hun chhung zawng hian Soweto, South Africa atangin songster member 40 chuang an rawn tel ve a, zaia rawngbawlna benglut tak neiin malsawmna tam tak an rawn thlen. An songster leader hi senior ve tawh tak, inpe em em mai a ni a. Ka hmuh apiangin Pu Joseph Vaikhuma (of Nigeria) min tehkhin tir thin. An uniform hi an inhmeh ka ti khawp mai. 
Thu Ka Sawi Ve: Congress chhung hian thusawina hun min pe ve a. Zirtawpni tlai Men's Fellowship-ah "Men, HIV & AIDS: Challenging Men to be Responsible" tih thupui hmangin ka sawi. Chitumbi Corps Hall kawtah kan TC hoin thutna rem chhuakin Officer leh patling tak tak 500 rual zingah ka zirlai anih bakah ka subject tuina ber hmanga thu ka sawi chu nuam ka ti ve khawp mai. Ka thahnem ngaih tluk zetin ka tawng min leh saktu Mr Hangoma hian thahnem a ngai a, anmahni cultural context nena inmil thlap, an hriatthiam theih zawng tak turin min leh sak niin ka hria. Congress hun chhung zawng hian "Doc, your lecture/speech was very powerful", tiin compliments ka dawng chamchi mai. A tla tha ve viau niin ka ngai ta. 
Ka thusawi ngaithlatu thutna chang ve lo thenkhatte. Motor kan hunna piah mai hi motor kawngpui a ni a, tin, a bul maiah hian 'tavern' a awm bawk a, khawlaia teihawi satliah te pawhin min rawn zawm ve zel a, kan tam ve khawp mai. 
Hei hi Congress-na hmuna Chikankata Corps chawlhbuk hung pawn ta zawk a ni a. Hetiang hian Corps tinin hmun bik kan nei theuh a, ei leh in, riahna pawh mahni hmun theuhah tih zel a ni. Mipaho zawng hmun khatah, hmeichhe ho zawng hmun dangah (nupa pawh riah dun phal a ni lo) a hrangin riah a ni thin. 
Thenkhat chuan hetiang hian supermarket atanga an lei puanin an rawn thawhchhuahpui mai bawk a. A remchang viau tho mai. 
Hei hi Lusaka (national capital) citadel ho chawlhbuk a ni a, a lian tha hem hem viau nain an leng meuh lo chu a ni . An 'Aizawl Temple Corps' ve ngang an ni a. 
Congress hmun tuala han teihawi vel pawh a thawven thlak khawp mai. 
Helai hi chu kan posh street ang ve deuh a ni a, thalaiten nuam an ti khawp mai.
The 'Flag' is held high everywhere.
General Ek In: Hetianga mipui tam punkhawmna mai bakah, riah khawmna leh eihona hunah hi chuan sanitation lam pawh uluk a ngai hle a. Pit latrine tha tak hmun tam takah siam a ni a, zun leh ek thlahdah an awm lo. A chunga mi hi chu inthiarna hmun tha bik, kan General-te nupa tana siam a ni a, running water a awm ngat bakah, bang leh chung tha tak neiin tala-a kalh a ni bawk a. India rama kan VIP te Black Cat commando ten an veng ang deuhin kan General inthiarna hmun hi Black Dog-in a veng ngat a nih hi!! Kan General-te nupa hian an hmang tangkai ta em tih erawh ka hre ta lo.
Chikankata Hospital leh SAMF tangkawpin a hmunah Clinic an hung bawk a. Congress hun chhung hian inentir za tam fe an awm, kan nurse leh Clinical Officer ten thahnemngai takin an thawk a ni.
Ambulance service tha tak buatsaih a ni bawk a, emergency case a awmin hospital lamah phurh thlen an ni thin. 
Mahni Corps theuh tana ei leh in siamtu Home League member-te an buai thei khawp mai. Hei hi kan Corps ei/in siamna hmun a ni a, hemi ni Pathianni hian arsa min hmehpui dawn a ni. Tui khawp ang le! 
" Nshima" (Vaimim dip chhum ban) tel lo hi chuan chaw eiah an inngai meuh thin lo a. Hei tunah pawh thahnemngai takin an chawh leh sauh sauh hi. Hetiang nute hi chhungkuaa malsawmna tam tak thlentu an ni. 
Congress palai hi kan kim khawp a, pasalthate an lo awm nawk ni tur a ni, hei Corps pakhat chuan tum khata an eisen bak Sakhi sa an pho ro der der mai. A chhumna tur meihawl, sikri leh tui pawh a bula hi a awm nghal e! 
Anni hi chawei kham hlim an ni a, an puar hmel euh euh khawp mai. Chawhnu inkhawm lo awm tur hi muthlu loa an tluan ka ring meuh lo e! 
The Congress concluded at 1400 hours Zambian time on Sunday 20th September 2009. A Home Leaguer walked past the deserted Congress Hall on the wall of which was a billboard displaying our beloved international leaders General Shaw Clifton and Commissioner Helen Clifton, who came all the way from London to Zambia to be with us and be like one of us. IS in General Puarak-ah a Rawn Hmang: Keini chhungkaw bik chuan kan International Secretary (IS-South Asia) Commissioner Lalkiamlova leh Commissioner Lalhlimpuii te nupa duhsakna leh awmpuina chu, Congress hun chhung zawng hian kan dawng bawk a. Kan General hi 'puarak'-ah rawn hmangin lehkhathawn duhawm tak leh kan fate lawm thil min rawn thawn a. Heng thilte hi Private Secretary to the General-in min hlan tawh hnuah, kan General ngei hian, "In IS hnen atanga envelope kan rawn ken kha i dawng em?" tiin min zawt leh bawk a ni.
Dal leh Cricket: Kan Indian pui Lt.Col. Davidson Varghese, Secretary for Business Administration te pawh an chhungkuain an rawn tel a, kan lo mikhual a. Paratha-te siamin Curry leh Dal te nen kan chawmkawi kual thei a. Hun tawt tak karah Cricket match hnih khat vel kan khel hman hram bawk a, a nuam ve khawp mai.
IET Nge Nge: Sawi lan leh ka duh chu, hospital tour kan neihpui tum hian kan General hian heta kan rawngbawlpuite zingah Mizoram/India Eastern Territory S.A. te rawngbawl dan tha a tihzia leh a ngaihsan zia a sawi lang kauh mai a. A dik reng a ni, Chikankata leh Zambia Territory pum pawh hian India Eastern Territory sipaite hnen atang hian zirlai tam tak chhar tur a nei ve ngei ang.
10 comments:
E!! ava han ropuiin a va han hmuhnawm tak em, sipai thlarau a chawktho khawp mai. A nuam ngawt ang le, pindan chungnunga rilru hmukhata an awm ang mai kha a ni dawn a, hlim loh ngaihna a awm lo.
Thlalak han en pawhin hmulthi a ding ur ur thei alawm le. Report ngaihnawm tak a ni.
E khai, Generalion Zambia a tlawhnaah kan tel ve a ni ngawt a lawm le!! hmun hrang hrang tlawhna thlalakte a chiang a, Zambia mite hmel hmang, Khawmpui an tih dan kal hmang, inkhawm zat chhiar dan, an ram va chalzia te nen lam kan hmu a lawmawm hle mai. General tlawhna programme a thu sawina i chang ve hi lawmawm ka ti hle mai. Hei hian in territory in an ngaihdan che a tichiang a, kan territory recommend tu tha tak a ni. In Inkhawmpui dan hi Tuirial Airfield hluiah ti ve ila kan tih kha an la tipuitling rih lo chu a ni a.
Chhiar a nuamin ava ngaihnawm ve!!! I tuina lam sawina tura hun i chang hi kan chhuang che in kan lawmpui a che.
Corps mahni ei rawng in bawl chawpa congress in hmang hi a tha ka ti. IET a kan HL thenkhat chuan hetiang hian an ti fo . Pa tlawmngai sawmin an ei rawng bawl tur an hruai nghal mai thin kha.
Zoram centenary pawh hetianga hmang tur hian inbuatsaih ila, a hmun tur erawh THQ hian a puala nei turin tun atangin hma la ta se... Tui awlsamna, eng pawh mai theihna, open space camp site neih tum ni ta se a tha viau lo ang maw....?
Central North or South te hian Tuirial Airfiel-ahte khuan huaihawt ta se, thal laiin a nuam ngawt ang, tih theih loh a nih ka ring lo.
Rover Scout, Guide nei Corps chuan tangkai takin an hmang thei ang a, pavalai, awm mai maite pawh a chhawr tangkai theih viau ang. Hmanah pawh kan sawi vak tawh kha.
A danglamna hian mite nasa takin a hipin ka ring tlat
@Fela=Zambia hrim hrim hi nuam i tih tur chi niin ka hria. Mi adventerous leh paukhauh nangni ang tan chuan hmun duhthusam a ni.
I rawtna ang hian Central division pahnihte chuan a huhoin emaw, a hrangin emaw Tuirial Airfield-ah chuan huaihawt ta se, bul tanna tha tak a ni ang. A tan hmasatu zawk zawk chu a dangin an copy ve ngei ang a, an intihhmuh ngei ngei dawn. An DC te ve ve lo hrilh ta la, South nge tan hmasa North? South lam hian an tih hmasak mai duh hmel e!
@Kiamlova, Puii=Thlalak heti zat hi inthlahrung tak, in lo thlir vek hman ang em tih dawn chungin ka rawn post a. I han sawi hmang hian hetih laia kan boruak tawn leh thil awmdan te an tilang pha ve niin ka hria a, ka lawm hle mai.
Zambian hian thil huphurhawma lang pawh hi hneh leh awlsam taka tih hi an thiam riau mai a. An theihna chhan chu eng dang ni loin an 'committed' em vang a ni. Kawng thui tak tak kalin chhangchhe nu leh pate pawh an chhungin an rawn tel kim thap thap thei a. An inpekna a ropui thin.
@ZL=Mizoram SA Centenary chuan a tihchi dawn chu. A hmun buatsaiha hnatlang neih hun atangin a 'boruak' tan ang a. I sawi ang hian biak in lawi ngai lo, mahse rawngbawlna talent dang nei tha em em site tan remchang kan siamsak bawk ang a, kan huangah kan huilut theih phah ang. Security, Sanitation, Health, Electicity, Sound, Music, Shelter, Media and Publicity, Transport, Food and Water etc-ah te hian mawhphurhna kan insiam vek ang a, mi tupawh mai kha an participate vek tawh mai dawn a ni. Hlutna nei vek kan nih dawn avangin 'kan' Congress/Rally a ni vek mai dawn a ni.
sipai uniform ha ve lo tan pawh a bengvar thlak thin ngot mai ... zaia nge2 ... dr.linda pasal neih tur te kha i lo hre v maw? oct 2 hian ...i lo hriat ve loh palh takin...i hman hunah ... www.emfimizoram.jimdo.com ... lo tlawh ve la...i comment te ka duha plus engemawni i rawn thawh ve a ngai ang...han en vel la...i rawn share na tur awm ang chu i hre thiam mai ang...thankx in advance!
A hmuhnawmin a ngaihnawm hle mai, khawmpui ropui tak a ni e, tin, i chanpual lam sawina hun i nei thei chu ka lawmpui a che. Keini Africa ho hi chu zai leh lam hi kan uar tlang a ni e ti raw.. helai pawh an item nei tur hi kal lam nen haw lam nen an zai chuah chuah zel...
Dr Zaia, i ti tha khawp mai. SA unau ramdanga mite han hmuh hi a lawmawm a, hetiang khawmpui hi a hmuna kal ve thei lo tan kal tluk nihna a awm a, photos i rawn psot hi ka lawm tak zet. Inchhungaw thlalak erawh a te lutuk a, a hmuh theih loh. Lian deuh hlek rawn psot thei la ava duhawm ve. Misual.com atangin ka lut a, Mizo website te hi an tangkai khawp mai.
Tunge ka nih i hre lo mai thei a, Lt. Col. K. Khara (R) (PG) tupa upa ber ka ni a, journalist ka ni.
@dr chhanhima ralte=i website min pek hi ka access thei tlat lo. Dr. Linda chu ka lawmpui e, tunge a pasal ni ta chu le?
@Varte=ka hriat chak mai mai chu an lam ang chuan i tive ngai em tih hi. Keini nupa chuan tih kan han tum thin tak naa, kan chek hian a ngam mawlh lo. Kan tive lo hlen ta mai.
@David M. Thangliana=Nangni ang milar engtin nge ka hriat loh ang. Min hre lo zawk anih hi. Jona te nena inkawm tawk vel kha kan nia. Ka blog lo tlawh fo thin la.
Hello
Zaia
Dr.P.C a Ka nia, Nazareth Hospital ah khan i kal hman khan ka hre hman thuak che a, i hnathawh a ropui khawp mai, Lalpan awmpui zel che rawh se.Zoramah pawh hian tih tur hmabak a la tam khawp mai keini kal chhuak ve thei lo te hian theihtop kan lo chhauh anga e.
Ka Blog a i comment ka lo chhuar a i blog hi ka lo hmu a
Take care
Post a Comment