Thilpek dawn hi a nuam, a lawmawmin a hlu. Thilpek min petute chu min hmangaihtu leh min duhsaktute an ni thin a, min duhsakna leh hmangaihna te chu thilpek leh thildang hmangin an lantir thin. Zambia rama kan awm chhung hian a ram mite duhsakna thilpek kan dawng zing ta malh malh khawp mai. A tam ber chu kan damlo enkawlte hnen atangin a ni.
Pa kum 75 mi, an khua thingtlang hmun hla tak atanga thlatin thirsakawr hmanga kan hospital rawn beltu hian tum khat chu Mai pum lian tak mai hi a rawn phur thleng zak a, duhsak takin min pe. Nula pakhat ramhuai zawl at, a serhah arte thisawng thun a, a chawna perek an phum sak, taksa leh thlarau damna chang ta pawh hian vawi khat chu Alu bag khat (kg 10) ama thar ngei hi an khua atangin min rawn ken sak ve ngat a, a hlut dan a dang khawp mai. Ani hian an kohhran chanchinbu chhiar tur min pe bawk.
Kan nupain sa tui kan tih berte zing ami Zoar sa (‘village chicken’ an ti) chu Zambia ramah pawh mite duhsakna zarah kan ei thei ve leh zel a. Kan seilenna Mizo thingtlang khuaa kan tih thin ang thoin anni pawh hian an Zoar hi min rawn pe ve fo ta mai. Kan lawm thin, mahni khua ang mai a ni!
Nau ka chhar sak leh zaichhuah sak nu leh pa thenkhat chuan an lawmzia entir nan an fa hming min sak tir bawk. Mizo hming tha 'Malsawma', 'Rinawma', 'Vohbika' tih hming te hi tun atanga kum 20 hnuah Zambian footballer lar te 'jersy'-ah a chuang a nih pawhin thil awm lo a ni bik lo ang. (Thil theih loh hi a awm si lo a!). Nu leh pa thenkhat ten kan chunga an lawmzia an lantir dan dang leh chu an fa thar piang kha kan hming ang an put tir ve mai thin. Kei pawhin ka hming ang pu mi pahnih chu ka nei ve ta!
Heng an hmangaihna leh duhsakna, an lawmna te an lantir dan mawl te te hian nun a tinuam a, kan khawvel a cheimawi a, thil tha ti turin min nawr kal thin bawk a ni.
11 comments:
Hei bak baka hming chher a awm theih dawn em ni le aw!!
I thlipek dawn zingah mai lian tak chu ka it deuh ber, mai hi finna a ni a,hmelthatna a ni bawk. Lo ei teuh teuh rawh u.
Vai nupa inhau tamna ber pawh 'I chhungte an lo kalin mai i siam a, ka chhungte an lo kalin i siam duh lo bik' tih a ni awm e.
Mizo hming chu a pu ve mai amaw? AN lam thiam ni? Nge nickname dang an inpe mai zawk? A tuipuiawm hle mai.
@Fela=Hming sak/chher hi nuam ka tihzawng tak a lo ni a niang, kan fate hming pawh hi a tluan hian ka sak ve ve a nia. Tun hnu hian ka inthiam lo deuh, mi chuan an pi leh pute an saktir thin a lo ni awm a. Ka phur lutukna lamah ka lo huamhauh deuh a ni. Piang leh te a awm ngai anih chuan ka kian ve tawh ang.
Mizo hming ka pekte hian an middle name-ah an hmang tlangpui. Entir nan - Flywell Malsawm Habeenzu.
Mai chu sawi leh ila, African culture nen inkungkaihna thuk tak a nei. An inpui ber kawmcharah hian Mai hi a zam ngei ngei tur a ni. Mai rah thlawn hi pa leh fa inlaichinna thlawn nen an tehkhin thin a. Mizoin "Mai leng an um ngai lo" kan tih ang chiah hian, kan thlai kha thenawmte ramah a zam lut a nih chuan thenawmte ram lam zawng ami kha chu an va ta neih thiang lo, thenawmte pual a ni.
Nau in neih hunah chuan Zambian hming in puttir ve thung loh chuan a fair lo vang. Khata in awm hriatreng nan in pu ve ngei tr niin ka hria.
Chuan, in loh chhuah hunah pawh in in hmingah khalam hming kha in pu bawk ang a, 'Chikankata' pawh ti tawp ta ula a mawi viau mai ang.
Nia, Chikankata Thanga tih te ni ta sela Burma Ramthanga te Shillonga te Ceylon Thangi te pawh an awm a.
In damlo enkawlte lawmna chu kan hriatthiampui khawp mai, Doctorin duat taka min enkawl hi hlu tak leh lawmawm tak a ni.
Maian te pawh kan ei ang chiahin an ei lo maw. In I S te hian kan hih ang chiahin an hik ve a, kan thuai ang chiahin an thuai ve a, Zambia a miten Maian an rawn thawn an siam laiin kan leng a, kan han hik dalh dalha kan han thuai vel chu a lo in ang si a, kan nui hawk hawk hlawm mai.
@Fela=I rawtna hi a tha dawn riau mai. Kan hospital administrator kalchhuakta Richard Bradbury te khan an fanu thar kha African hming Savanah an puttir a, tuna ka doctor-pui Deryn Watson te hian an fanu thar hi Sahanah an ti bawk.
@Kiamlova & Puii: Maian chu an ei ve nasa. Mahse a par hma chu an ei hlau tlat thung. A par hnu erawh chuan keini ang thoin a parte nen an chan dip a, badam dip te an telh bawk a, naupang sawngnawi tan a tha an ti. Maian rep ro te hlei hlei an uar. Kan African IS te chu an tih dan hmangah an Mizo hret zawk anih hmel.
Kum 20 hnu lamah Mizo hming Zambia milarte zingah chuan la lang mawlh rawhse.
Mai ai chuan maian tui ka ti zawk. Major R Tlawngmawii (Western DYS nupui)chuan an training laiin "Savawm chaw ka ei peih lo" a ti thin.
Zoar ngei in ei thei chu in vannei e. Duhsak tlak a rawng in bawl hi kan lawmpui che u.
@ZL=Kei pawh Maian chu tui ka ti zawk alawm. Mai hi chu a ban chi emaw, a thlum chi anih loh chuan ka ei tha duh vak lo.
Zambian ho Mai ei dan chu a dung zawngin an phel a, a mu paihin an an vel a, an chhum tawp a, an lek lawrh lawrh tawh mai thin.
Khualzin thlenna ina cham rei deuh tum te chuan an thlen inah Mai an pu/khai lut deuh tlangpui.
Thil pek sawi tak ah chuan, hei Sunday khan SD kan la khawma, Nuai 1 chuang lai in Nikum kan khum. Kan lawm in Pathian kan fak.
Jona-te nen in lo inhre reng a ni maw? Anni pawh nau an nei leh tep tawh, a pali-na tur. In hnathawh a ropui a, healing ministry hi tupawh mai hian kan mamawh a, tunlai pawh Mizoramah chuan R Vanlalzuava nupui Remtluangi tihdam rawngbawlna miin an hlut hle mai. Hmuntin hmuntang atangin an rawn pan a ni ber e.
e, in thawk ropui e. midang tana thiltha tih tluka hlu a awm hlei nem.
@dr_feelgood=A ropui hle mai, SD target nuai khat chuanga in khum thei hi. In inpekna san zia lanna dang leh chu lakkhawmnia Temple khat tlata inkhawm in kal hi a ni. Pathian hnenah lawmthu kan lo sawi ve e.
@david m thangliana=Jona te nupa chu kan va lawmpui ve. Chhungkaw pa nih a tlin kan ti khawp mai. Tluang taka fa an neih kan duhsak e.
@Hlua=I sawi dik chiah. 'Midangte' tan thil tha kan ti emaw kan tih lai hian Pathian hian a aia tam malsawmnain min vur 'let' thin.
Post a Comment