Thuhmahruai: September ni 1 - November ni 30, 2010 chhung home furlough kan hmang a, thla 3 zan a ni nain reilote-ah kan hmang zo thuai mai a, a khamawm loh hle mai. Tin, kan zin kual nasat bakah inhmanna tur tul chi hrang hrangin min lo hmuak bawk nen, kan 'hahchawl' ve hi 'chawlhah' a ni zawk mah awm e. Hemi anih avang hian kan zin report hi bung thumah tal thensawm a ngai dawn a, kan chawlh hun tawp ber lama Kenya kan tlawh thlak thuin ka'n tan ang e. Kenya rama kan rawngbawlpui Pi Hlui, Pu Bula leh an fate zinga kan cham chhung hi ni 28-29 November 2010 a ni a. Mumbai to Nairobi Flight kan miss avangin ni 27 November 2010 kha Mumbai International Airport-ah kan tlingtla a, chuti chu ni lo se hemi ni pawh hi an hnena cham tur kan ni. Mahse pawi kan ti ta lo. Mumbai-a kan hotu ni bawk, nu leh pa ni bawk Nu Kawli leh Pa Rama (Colonels Lalramhluna leh Kawlramthangi), kan ngaih em emte nen inhmuhna hun tha tak kan neih theih phah a. Anni nupa hian kan harsatna tawhna chungah nasa takin min tanpui a kan lawm hle a ni.
Nairobi khawpui daifema kawngsir Bazar 
Nairobi khawpui laili hmun pakhata supermarket pakhat 'Nakumatt'. A chhunglam a ropui tehreng nen thlalak min phalsak lo tlat thin atin a ni.
Tlangval room, hei an football team tan zawng pawh a hriat theih e. Mapuia leh Dennis-a te room hi Kenya kan cham chhungin kan tihnawk hneh khawp mai. Chhangchhia chhungkua dawl zo takin min lo thleng a, kan lawm hle
Pafa an tualzawlah hockey khelh-ah an incho mek a nih hi. Tualzawl an nei zau a, badminton court pawh an nei
Fapa pahnih fel deuh deuh nei ta chu car pawh an vawng fai thei hle mai. Pu Bula te nupa hi an fate hian an chawimawi khawp mai, American International School-ah ngat kalin khawvel ram dang sorkai diplomat teho fate nen koki insiin tual an chai za thin a ni
Pi Hlui thlai huana antam kung thenkhat. Phuihnam te, samtawk te te an ching bawk a, Zambia thlengin kan hawn thla ve. Tui tak a ni
Mual inkhawm turin an fehchhuak mek. 'Zoram Khawvel' ziaktu L.Keivom, IFS chu India Ambassador niin Nairobi khawpuiah hian a lo tualchai tawh a. Kenyan Salvationist ten tatawrawt band nena mual inkhawm an uar thin zia leh, chumi a hmuha an veng pa Churachandpur district-a Chhandamna Sipai rinawm Pu Zulawma a hriatchhuah tir thin zia thu chu a essay ziah pakhat "Kros Sipai Mal Tla" tihah a tarlang. L. Keivom hian a lo sawi dik khawp mai, Pathianni zingtin hian Kenyan Salvationist te chuan mual inkhawm an nei vek thin a ni. 
Lt. Colonel Lalbulliana te In. Tunhma Sap ho kutchhuak ngat kha a la ni a. Lung chang lian, chhah leh sei tak tak rem chhoha sak pum a ni. Ban a nei miah lo a, nghet tak a ni tho. Hetiang lungchang tha hi ka la hmu lo. Hetiang lung deuh vek hi in sak nan an hmang. A chhung lam hi an sa tha em em leh bawk a, a chhuatte hi thingchang tak remkhawm hmanga phah chhuah vek a ni. Thasik laiin a lum a, nipui laiin a vawt, an ti
Vei lama he motor kawng hnuhma hi 'Pu Bula tum' kan ti mai. Nitin an nupaa an hnathawhna hmuna fehchhuaka an haw lehna kawng a nih avangin. Hei hi Salvation Army compound chhung vek a ni tawh a, in lo lang khi anmahni in tho kha a ni
Helai tualzawl leh thing mawi tak te hi Pu Bula te in bul hnai ami tho a ni a, hetiang hian phul te hi uluk takin an enkawl a, a hrut rualna khawl (lawn mower)-in an ti ve thlap thin
Hei pawh hi Salvation Army building lian tak pakhat a ni a, hostel/guest house angin an hmang niin ka hria
Hei hi Salvation Army hostel/home building pakhat bawk a ni a, an chei ulukin a hmun a fai nuam khawp mai
Home naupang thenkhat thla ka lakpui a, an uang thei khawp asin!
Nairobi khawpui hi mumal taka plan niin ka hmu. In leh lo an inrem felfai tha hle a, kawngkam sir tuak tuak te hi an chei mawi tha hle. Pangpar leh thingphun an uar em em a, hmun zawl, tui tlin theih lohna tawka awitlan deuh si hi a ni a, an enkawl fai bawk nen a Sapram ruih mai a ni
Hetiang te hi a ni an kawngpui sir an enkawl dan chu, bik a na
Salvation Army Kenya East Territory headquarters kawt zawlah Marcus-a. Phul leh pangpar, hnim te hi an enkawl tha asin!
Hei le Lt Colonel Lalbulliana, Kenya East Territory-a an Secretary for Business Administration (SBA) chu. A palian bik lo nain midum palian leh hrawl tak takte tan an 'pu' nia rawngbawlsaktu a ni tlat. A office room te hi a zauin a changkang em em mai a, a fai tle thim rulh vek mai a ni. Hotute leh Pathian mittlung taka rawngbawltu chhungkua an ni 
Kenya East Territory headquarters gate pui te, an gate vengtute chawlhbuk thleng hian a changkangin a nalh em em vek mai
Territorial Headquarters main building hi nalh veh vawh tak asin. A chhung hmun pawimawh zawng zawng chu Pu Bula te nupa hian min fankual pui a, plan a thain eng luh dan chin vel pawh tawk tak vek a ni, a khawi pindan mah hi luah chakawm loh tur bik a awm lo zu nia. Aizawla kan Booth Mansion te ai chuan a thain a changkang lawr!
Headquarters kawt zawl, Salvation Army compound ni vek tawh si a ni. Hmun an nei zau a, hemi hma lamah hian ram ruak zau tak, 200 sq meter vela zau an la nei. A piah deuha in mawi tak chhawng ve lo, lo langah sawn conference hall, kitchen leh dining te a awm
Kenya ramah chuan Pu Bula nen hian unau angin kan inchhal a, an thiante chuan "Colonel in inang hle mai, mahse i nau hi a hleitling zawk a nih hi" an ti!
Nuho office pawh a changkang khawp mai. Hemi thla ka lak lai hian Pi Hlui hian Lagos, Nigeria-a Pi Heleni chu an THQ kan tlawh thu email-in a zuk hrilh mek a ni
Nilum ai chungin puitlingin thingpui no te kan dawm a, naupangte an lo infiam bawk a. Kan cham chhung zawng hian Pi Hlui te hian duat takin min enkawl a, Mizo chawhmeh tui tak tak (Sangha rep from Major Pari, Behlawi rep, Dawl rep from Capt Zodini, Chhang ban from Capt Hriatpuii leh Pi Thangi leh a dangte, Sa rep te pawh le!) min hmehpui a, Mizo zaipawl video leh Chapchar Kut video te Nairobi khawpuiah ngei kan thlir ho thei a, tawngtaihona te pawh kan nei a, lawmawm kan ti hle. Airport-ah an nupain min lo hmuak a, min thlah leh thlap a, inngai tak chungin kan inmangtha ta a ni.
