Universiteit Stellenbosch University international student ka nih angin May 11, 2010-a tanin chawlhkar khat chhung zawng Winter School kaiin, Cape Town, South Africa (SA)-ah ka zuk zin leh a. Africa khawmualpui chhim tawp, Indian Ocean leh Atlantic Ocean karcheh hmun tih takah thlasik ruah a sur nileng zankhua zak zak a, tun tum ka zin chu a vawt takzet a ni. Chutih laiin, ka thlen ni atanga chhiara thla khat hnu chiah chiaha tan tur, khawvel ennawm hmuhnawm ber mai, 2010 FIFA World Cup thlengtu tur an nih avang erawh chuan an inpuahchah mup mup mai a, an nghakhlel boruak erawh a 'lum' tha vat vat khawp thung! Hetiang boruak kara ka kal chhan ber ka MPhil atana 'Research Workshop' zuk neih pawh hi rual pawl lo kan ang lek lek a, a inhmeh lo deuh tut tein ka hria! Amaherawhchu, ka cham chhung hian theih ang tawkin a ram mite boruak tawn hi hip pui ve thain ka hria a, kan university campus thlalak thenkhat bakah, South Africa 2010 FIFA World Cup kaihhnawih ka hmuh phak chin thil leh hmun thlalakte ka han tarlang a ni e.
Ka thlenna In JJ Guest House hi a hmel enin a tlawm naa, a hmunhma hi a nuamin a mawi ve khawp mai. Ka tan a remchan lehna chu a neitunu hi kan university Environment and Sustainable Science department-a course coordinator a ni a, ruah sur hnuaiah pawh hul phialin a car nuam takah nitin a rualin ka kalin ka haw thei a ni.
Ka thlen In bul hnai maiah hian SA-a supermarket lar tak ve SPAR a awm a, mamawh chikim lam theihna a ni. Ei leh In tur, a chikim piah lam thleng a awm! A hmunhma pawh hi mawi veh vawh tak a ni.
Stellenbosch Town leh kan university campus timawitu pakhat chu, a bul vela tlang, ruam leh tuipuite bakah hetiang architectural design hi a ni.
Helai hmun hi zirlaiten notice leh information an duh apiang an tarna hmun a ni. An hmang zalen khawp a, an thil tar tam tak phei chu keima mimal ngaihdan phei chuan 'censor' phawt ngai chite an niin ka hria.
University campus car parking lot pakhat. University campus hi a him khawp mai. Student, faculty leh staff zawng zawngin electronic (staff/student) card kan nei vek a. Campus luhna leh chhuahna gate, building kawngkhar leh tukverh reng reng hi heng electronic card chauh hmanga hawn leh khar theih an ni hlawm. Eng sen vet vet awmna hmaah kan card kha kan han lek kang zeuh a, gate/kawngkhar-ah kan lutin kan chhuak mai. Card nei lo tan a theih ve loh.
University building thenkhat hi chu hun rei tak tawha sak te a ni hlawm. Hei hi class kan neihna thin ‘Industrial Psychology Building’ a ni a, kun 1913 daih tawha sak ni mahse an enkawl hnum tha a, a la thar mawi tha khawp mai. 
Stellenbosch Town hrim hrim hi SA mingo (white) chenkhawmna a nih angin kan university zirlai zingah pawh hian mingo an tam ber a, 67.6% an ni. A bak zawng hi mihang (black), thlahpawlh (coloured) leh Indian community te an ni. Mingo zirlai bitna hmun a nih avang leh architectural design avangte hian Europe ram khawimaw laia university pakhat emaw tih ve mai theih a ni.
Stellenbosch Town leh university campus chhung kawngsir zawng zawngah hian Oak thing phun a ni a, a mawi khawp mai. Kan university hian symbol atan Oak thing hnah a hmang a ni.
Kan hmuh ang hian university official colour chu maroon a ni a, building chung leh kawng zawng zawng hi maroon colour hnawih vek a ni. Zirlaiten thirsakawr (‘bike’ an ti mai) an hmang uar khawp bawk.
Hei hi student centre ‘NEELSIE’ a ni a. He building hi lei hnuai lam nen thlengin chhawng tam tak a ni. A chhungah hian restaurant changkang tak tak tam tak, bar, coffee shops, bank, post office, ATM, air ticket booking office, pool table, thuamhnaw zawrhna tam tak, stationery, bookshops leh zirlaite mamawh chikim zawrhna a awm. Mizoram thingtlang khuain a neih loh thil tam tak hemi inchhung maiah hian a awm kim vek a ni. Hmun dang aiin thil man a tlawm zawk lehnghal!
University parking area dang leh chu. A tir atanga an thil ruahman hmang reng rengah hian an ngaihtuah thui chikim tih a hriat. Duhthala hman tur hmun a awm.
Johannesburg (Jo’berg) International Airport! SA port of entry ber a nih avangin, 2010 FIFA World Cup chhim tur mipui tam berten SA leilung an rah hmasak ber tur chu he hmun hi a ni.
Jo’berg Airport hi, 2010 FIFA World Cup an thlen dawn avang hian, namen loa runway leh terminal building te zauh belha tihchangtlun a ni a. Nikum January thlaa ka zin lai ai khan a lo ‘huau’-in a lo changkang daih mai.
Jo’berg Airport terminal chhunga Boarding Gate 11A innghahkhawmna leh chawlhna hmun. A zau tha hem hem khawp a ni.
2010 FIFA World Cup mascot Zakumi chu. SA internet country code ‘za’ tih leh African ram tam tak tawnga number sawm sawina ‘kumi’ tih atanga phuah a ni.
Football design hrang hrang leh 2010 World Cup khel tur ram hrang hrang thuamhnaw leh chhinchhiahna te chu hetah hian an zuar chikim khawp mai.
Jo’berg hi 2010 FIFA World Cup match dang bakah opening leh final match te khelhna hmun tur a ni a, Host City title pek a ni a, an stadium mipui 88, 460 len theihna pawh hi Soccer City tih a ni. He thlalak hi stadium hmun ni loin Airport chhung a ni e.
South Africa atanga Lusaka, Zambia pana ka rawn haw hian khua a la thiang tha chuang vak lo a. Chhum tam hle mahse, chhumte tihbuai theih loh piaha sangah kan South African Airways pilot hian min thlawhpui daih thung a, chhumte chu kan chhuk en thei tawh a ni. Nun kawng hi chhuk chhoin chhum chhah takin khawhmuh a tihfiah loh chang awm thin mah se, Isua Krista nen chuan harsa loin kan paltlang thei thin a ni. Harsatnate chu ‘hmelma’ an ni tawh ngai lo a, min chawikangtu ‘ban (pillar)’ nghet tak an chang tawh zawk thin.
Tichuan Nu berin fate nen Airport-ah min lo hmuak a. A hahdam thlak thin ngei mai. Fel leh thuawih taka an lo awm avangin lawman atan kan fate pawh shopping kan neih pui a.
A hlimawm thin ngawt mai.
Kan Transport Officer Pu Coster Kazila pawh Airport-a ka nupui fanaute rawn phur thlengtu, kan thian tha, hnathawk tha leh rinawm a ni a, a duhzawng tak chaw eipui hi a phu a ni. 
