Thilpek dawn hi a nuam, a lawmawmin a hlu. Thilpek min petute chu min hmangaihtu leh min duhsaktute an ni thin a, min duhsakna leh hmangaihna te chu thilpek leh thildang hmangin an lantir thin. Zambia rama kan awm chhung hian a ram mite duhsakna thilpek kan dawng zing ta malh malh khawp mai. A tam ber chu kan damlo enkawlte hnen atangin a ni.
Pa kum 75 mi, an khua thingtlang hmun hla tak atanga thlatin thirsakawr hmanga kan hospital rawn beltu hian tum khat chu Mai pum lian tak mai hi a rawn phur thleng zak a, duhsak takin min pe. Nula pakhat ramhuai zawl at, a serhah arte thisawng thun a, a chawna perek an phum sak, taksa leh thlarau damna chang ta pawh hian vawi khat chu Alu bag khat (kg 10) ama thar ngei hi an khua atangin min rawn ken sak ve ngat a, a hlut dan a dang khawp mai. Ani hian an kohhran chanchinbu chhiar tur min pe bawk.
Kan nupain sa tui kan tih berte zing ami Zoar sa (‘village chicken’ an ti) chu Zambia ramah pawh mite duhsakna zarah kan ei thei ve leh zel a. Kan seilenna Mizo thingtlang khuaa kan tih thin ang thoin anni pawh hian an Zoar hi min rawn pe ve fo ta mai. Kan lawm thin, mahni khua ang mai a ni!
Nau ka chhar sak leh zaichhuah sak nu leh pa thenkhat chuan an lawmzia entir nan an fa hming min sak tir bawk. Mizo hming tha 'Malsawma', 'Rinawma', 'Vohbika' tih hming te hi tun atanga kum 20 hnuah Zambian footballer lar te 'jersy'-ah a chuang a nih pawhin thil awm lo a ni bik lo ang. (Thil theih loh hi a awm si lo a!). Nu leh pa thenkhat ten kan chunga an lawmzia an lantir dan dang leh chu an fa thar piang kha kan hming ang an put tir ve mai thin. Kei pawhin ka hming ang pu mi pahnih chu ka nei ve ta!
Heng an hmangaihna leh duhsakna, an lawmna te an lantir dan mawl te te hian nun a tinuam a, kan khawvel a cheimawi a, thil tha ti turin min nawr kal thin bawk a ni.
